| Hástet stuorráid ja smávváid searvat (Avvir) |
| Wednesday, 11 March 2009 14:21 |
Mánáid govva boazodoalus Mánáid tevdnengilvvu fádda lea "Mánát boazodoalus" ja lágideaddjit hástalit boazodoallománáid tevdnet gova mii govve boazodoalu nu go mánát oidnet ealáhusa. Mánát mearridit ieža maid tevdnejit, áidna eaktu lea ahte tevdne juoidá mii lea čadnon boazodollui. Gilvui sáhttet gitta 16-jahkásaš mánát searvat. Diplomat ja bálkkašumit Buot tevdnegat mot bohtet sisa áigemearrái leat mielde gilvvus. Lágideaddjit lohpidit diploma buot oasseváldiide, ja bálkkašumi buoremus tevdnegiid ovddas. Buot tevdnegat galget leat mielde čájáhusas mii ceggejuvvo Guovdageidnui Máilmmikongreassa oktavuođas. Máilmmi Boazoálbmogiid Searvvis oažžu dieđuid áigemeriid birra ja makkár gáibádusat leat čadnon govaide maiguin áigu searvat. Viiddis márkanat Máilmmikongressii vurdet gussiid olu riikkain, ja dan dihte háliidit lágideaddjit doallat márkaniid gos fállet buotlágan dáidagiid, buktagiid ja hábmemiid maid davviguovllu álbmogat leat ovdánahttán – árbevirolaš biepmus ja duojis gitta filmmaide ja buot lágan buktagiidda, oktan industriála ovdánahtton buktagat ja hábmemat maid earát leat ráhkadan ja mat sáhttet leat miellagiddevaččat davviolbmuide. Lágideaddjit bovdejit buohkaid geain lea beroštupmi searvat márkaniidda čájehit/vuovdit gálvvuideaset. Sii fállet nuvttá stándasajiid Báktehárjjis siste ja olggobealde Báktehárjji. Jus lea beroštupmi searvat márkaniidda, de váldde oktavuođa Máilmmi Boazoálbmogiid Servviin.
Related Articles/Posts |
Boazoálbmogiid 4. máilmmikongreassa oktavuođas háliidit čájehit sámi ja davviguovlluid čehppodaga. Sihke duojárat, dáiddárat, eará gálvobuvttadeaddjit ja mánát bovdejuvvojit searvat ja čájehit ivdnáivuođa. |
 |
 |
 |
 |
 |