| Viiddis ávžžuhus suodjalit geaŧkki ja buoridit boazovahágiid buhtadeami |
| Written by Eino Kuokkanen |
| Wednesday, 22 October 2008 00:00 |
Geaŧkki boazodollui dagahan vahágiid buhtadusortnega ođadeami galgá jođánit čielggadišgoahtit. Dasa lassin geaŧkedutkamuššii galgá juolludit lasi ruđa. Dákkár ávžžuhusa leat ovttas čujuhan eana- ja meahccedoalloministeriai Máilmmi luonddufoanda WWF, Bálgosiid ovttastupmi, Meahcceráđđehus, Fuođđo- ja guolledoalu dutkanlágádus ja Lappi fuođđogáhttenbire otne Roavvenjárggas. - Buhtadusaid geaŧkki dagahan boazovahágiin galggašii máksit boazodoalliide guovllu geaŧkenáli sturrodaga vuođul, dadjá WWF suodjalankoordináhtor Petteri Tolvanen. Su mielde dálá vuogádat ii doaimma bures go buhtadusa vuođđun lea dušše geaŧkki goddin bohccuid mearri. Ođđa ortnega galgá guorahallat dárkilit Bálgosiid ovttastumi boazorávvejeaddji Inga-Briitta Magga mielde buhtadusortnega galgá buoridit muhto dan galgá vuos guorahallat dárkilit. Goaskinvahágiid reviirabuhttenortnega ii sáhte njuolgga sirdit geaŧkevahágiidda. - Dálá ortnegis lea váttisvuohtan dat ahte álo ii sáhte duođaštit gean bohccuid geaŧkki lea goddán go dat láve čiehkat oaivvi. Ná buhtadus manná bálgosii, dadjá Magga: Geaŧkedutkamuša lasihemiin lea ulbmil čielggadit man ollu geaŧki goddá bohccuid jagis. Magga mielde geaŧkkit goddet beali buot beađuid goddin bohccuin. Diibmá rehkenaste geaŧkki goddán 1.700 bohcco ja ovddit jagi 1.300. Mearri lea su mielde ain lassáneamen. Suoma geaŧkenálli lea dál sullii 160. Dan dikšunplána lea válmmaštallamis. Doaimmaheaddjin Eino Kuokkanen Related Articles/Posts |