| Norgga bohccuid buktin ii ovdán jos njuovahat ii riskere EU-ruđaid |
| Written by Yle Sami Radio |
| Friday, 10 October 2008 00:00 |
Norgga bohccuid buktin Ohcejohkii almmá EU-doarjagiid vejolaš máhcaheami ii ovdán mange láhkai EU-byrokratias. Doarjjaeavttuid geažil Lappi BE-guovddáš ii sáhte addit bohccuid buktinlobi. Ievttá čoahkkima boađusin bázii dat ahte ášši ii ovdán, jos Gálddoaivvi boazonjuovahat ii váldde doarjagiid massima riskka ja buktigoađe njuovvanbohccuid Norggas. Dan maŋŋá BE-guovddáš dahká vejolaš mearrádusa doarjagiid bearramis. Ja dan maŋŋá fas boazonjuovahat vejolaš váidalusaid. Áššis sáhttá šaddat jagiid proseassa. Bohccuid buktin fitnodatčoahkkimii Njuovahaga ráđđehusa ságajođiheaddji Aulis Nordberg dadjá ahte ráđđehus dahká boahtte čoahkkimis áššis evttohusa fitnodatčoahkkimii. Fitnodat šaddá guorahallat gánnehago váldit dán riskka dan ektui man ollu Norgga bohccuid buktin ruđalaččat buoridivččii njuovahaga gánnehattivuođa. Buktin álggašii goit áramušta easka boahtte čavčča. Leago dás mihkkige jirpmiid? Norga, mii EFTA lahttun deavdá EU-njuolggadusaid measta buot oktavuođain uniovdnii, gehččojuvvui mannan doarjjabajis nu daddjon goalmmát riikan, mas čuovui eavttuide buktinráddjehus. Dál ođđa bajis dát ráddjehus lea sihkkojuvvon, dadjá Nordberg. Su mielas njuovahat lea šaddan jierpmehis dillái. Gažaldat lea maiddái ollu ságastallon rádjeovttasbarggus. Maiddái ossodathoavda Hannu Linjakumpu BE-guovddážis atná njuovahaga dili EU-doarjagiid ektui váidalahttin. Njuovahat lea čadnojuvvon doarjjaeavttuide vel čuovvovaš njeallje jagi. Related Articles/Posts |