| Duogáš |
Boazoealáhusa Nissonfierpmádat Guovdageainnus lea guhká bargan doalahit, nannet ja ovdánahttit boazoealáhusa árbevirolaš máhtu ja oahpaheami. Fierpmádat álggahuvvui 1999’s. 2001’is plánegođii fierpmádat ásahit oahppoguovddáža boazoealáhussii mii galggai ovddidit olles bearraša birgenlági boazoealáhusas. Fierpmádaga jahkečoahkkimis 2001as válljejuvvui bargojoavku dan váste. Bargojoavkkus ledje dát: Karen Marie Eira Buljo (jođiheaddji), Ellen Inga Kristine Hætta ja Inga Marianne Lango. Isak Mathis Henriksen lei konsuleanta veahkkin. Bargojoavkku boađus ovdanbuktojuvvo raportas “Boazodoalu árbevirolaš máhttu ja oahpaheami guovddáš čielggadan bargojoavku” 2002. 2007as biddjui ođđa bargojoavku johtui geat galge bargat ain viidáset dainna áššiin. Bargojoavkkus ledje Karen Márjá Eira Buljo (jođheaddji), Karen Anna Buljo ja Ellen Marie Turi Gaup. Sii válde oktavuođa Riikkaidgaskasaš Boazodoalloguovddážiin ja nu sii álggahedje ovttasbarggu singuin ja 2008’s álggahuvvui ovttasbargoprošeakta “BIRGEN “. Prošeakta lea jurddašuvvon álgo álggus 3 jagi badjel ja galgá nannet boazoealáhusa bearašealáhussan. Birgen prošeavtta ulbmilat leat : Ovdánahttit ja ealáskahttit boazoealáhusa ollislažžan Nannet olles bearraša birgenlági boazoealáhusas. Čohkket boazoealáhusa árbevirolaš máhtu ja čehppodaga. Nannet árvvu ja fuomášuhttit boazoealáhusa nissonolbmuid doaimmaid ja bargguid. Ovdánahttit ja ealáskahttit boazoealáhusa nissonfierpmádagaid. Boazodoalu Ovdánahttinfoanda ruhtada prošeavtta. Related Articles/Posts Birgen |
